ခရမ်းချဉ်စိုက်ပျိုးနည်း အပြည့်အစုံ
⦿ မျိုးရွေးချယ်ခြင်း
ရောဂါပိုးမွှားဒဏ် ခံနိုင်ပြီး အထွက်ကောင်းသည့် Hybrid မျိုးများကို ရွေးချယ်စိုက်ပျိုးပါ။
(လိုရာ ၉၀၉၊ လိုရာ ၉၈၁၊ ၀၉၇)မြန်မာပြည် အထက်ပိုင်း ဒေသများတွင် အပူဒဏ်နှင့် ရောဂါဒဏ် ခံနိုင်သော (လိုရာ ၉၀၉) ကို စိုက်ပျိုးပါ။အင်းလေးဒေသအတွက် (လိုရာ ၉၈၁)မျိုးများကို စိုက်ပါ။
⦿ မြေယာပြုပြင်ခြင်း
ရေသွင်း၊ ရေထုတ် လွယ်ကူပြီး မြေဆီသြဇာ ကောင်းမွန်သည့် မြေမျိုးကို ရွေးချယ်ပါ။ ထယ်ရေးနက်နက်၊ ထွန်ရေးညက်အောင် ဆောင်ရွက်ပါ။
ထွန်ရေးညက်လျှင် ကြမ်းရိုက်ပြီး ၃ လက်မ ကြောင်းများ ဆွဲ၍ ဘောင်များ ပြုလုပ်ပါ။ ရေသွင်း၊ ရေထုတ်လွယ်ရန် ဘောင်များကို ၂၀ လက်မလျှင် ရေကာတုံး တစ်တုံး ဖြတ်ပေးပါ။
⦿ ပျိုးထောင်ခြင်း
မျိုးစေ့များကို ဘောင်နှင့် ပျိုးထောင်နိုင်သလို ပျိုးအိတ်များနှင့်လည်း ပျိုးထောင်နိုင်ပါသည်။
ဘောင်နှင့် ပျိုးထောင်ပါက ၃ ပေ ဘောင်များ ပြုလုပ်ပြီး ပျိုးဘောင်တွင် နွားချေးဆွေး၊ မြေဆွေး၊ စက်ဖွဲပြာနှင့် လောင်မှိုသတ်ဆေး၊ တော်ပီဒို ၃ဂျီအာ များထည့်၍ ဘောင်ကို ညီညာအောင် ပြုလုပ်ပါ။ ဘောင်ပေါ်တွင် စိုက်ကြောင်းများ ဆွဲ၍ မျိုးစေ့များကို ညီညာစွာချပါ။ မျိုးစေ့ချပြီးလျှင် စိုက်ကြောင်းများကို မြေဆွေး၊ နွားချေးဆွေးများဖြင့် အပေါ်မှ ဖြူးပေးပါ။ ပျိုးဘောင်များကို ကောက်ရိုး (သို့) မက်ခြောက်များနှင့် ဖုံးအုပ်ပေးပြီး ရေလောင်းပါ။
ပျိုးအိတ်နှင့် ပျိုးထောင်ပါက ၃ လက်မ x ၄ လက်မ ပျိုးအိတ်များကို ဘေးတွင်အပေါက်များ ဖောက်ပြီး စပ်မြေကို ထည့်ပါ။ စပ်မြေကို စက်ဖွဲပြာ ၁ ဆ၊ နုံးမြေ ၂ ဆ၊ မြေဆွေး၊ နွားချေးဆွေး ၁ ဆ လောင်နှင့် တော်ပီဒို ၃ဂျီအာ ရောစပ်ပါ။ မြေထည့်ပြီး ပျိုးအိတ်များကို ရေလောင်း၍ နှပ်ထားပါ။ ပျိုးအိတ်များအတွင်း မျိုးစေတစ်စေ့ချင်းစီကို အ စေ့မြုပ်ရုံထည့်ပြီး မြေဆွေးဖြင့် ဖုံးအုပ်ပေးပါ။ ပျိုးအိတ်များကို ရေလောင်း၍ အပေါ်မှကောက်ရိုးဖြင့် ဖုံးအုပ်ပေးပါ။
ပျိုးပင် (၇) ရက်သားစ၍ ကောမက် (စိမ်း)၊ မိုရယ်လ်မုန်းနှင့် ရီဗိုက်ကို ဖျန်းပေးပါ။
⦿ စိုက်ပျိုးပြုစုခြင်း
ဘောင်မှနှုတ်သော ပျိုးပင်များကို ရေ (၂) ဂါလန်တွင် ရီဗိုက် ၅ စီစီ + မိုရယ်လ်မုန်း ၁၀ စီစီ ဖျော်ရည်တွင် အမြစ်များကို စိမ်၍စိုက်ပါ။ ပျိုးပင်(၂၅) ရက်သားတွင် စိုက်ခင်းသို့ရွှေ့ပြောင်း စိုက်ပျိုးပါ။
ပင်ကြား ၁ ပေခွဲ စိုက်ကျင်းများ တူး၍ ရေလောင်းစိုက်ပါ။ ရေသွင်းလွယ်ကူသောနေရာများတွင် စိုက်ကြောင်းများအတွင်း ရေသွင်း၍ စိုက်ပါ။ စိုက်ပြီး (၇) ရက်တွင် အပင် ခါးဆွပေးပါ။
တိုင်ထောင်၍ စိုက်လျှင် အပင်သက်တမ်း ၁၀-၁၅ ရက်သားတွင် တိုင်များထောင်ခြင်း၊ တန်းများချည်ခြင်း ပြုလုပ်ပါ။ ပထမတန်းကိုမြေမှ ၁ပေခွဲတွင် ချည်ပါ။ ဒုတိယတန်းကို ပထမတန်းမှ ၁ ပေ ခွာချည်ပါ။
ဝိုင်ခွအောက်ဘက်ရှိ အတက်များကို အပေါ်ဆုံး တစ်တက်ချန်၍ ဖဲ့ပေးပါ။ ဝိုင်ခွမှ ထပ်၍ ထွက်လာသော ကိုင်းများအား တန်းအတွင်း အဆင့်ဆင့် ချည်နှောင်ပေးပါ။
🚫 အပင်သက်တမ်းတစ်လျှောက် ပေါင်းမြက် ကင်းစင်အောင် ဆောင်ရွက်ပေးပါ။
⦿ မြေသြဇာအသုံပြုနည်း
မစိုက်ခင်နွားချေးဆွေး သစ်ရွက်ဆွေးများထည့်သွင်းပေးပါ။
မြေသြဇာ အသုံးပြုမည်ဆိုပါက ကောမက်ပရီမိုလိုက်+ ကောမက်ထွက်တိုး ဂျီ ၄၅ မြေသြဇာအသုံးပြုနိုင်ပါတယ်။
⦿ ရေသွင်းခြင်း
ခရမ်းချဉ်သည် မြေမစို မခြောက် အနေအထားတွင် ရှိရန် လိုအပ်ပါသည်။
ရေကို ၇ ရက်ခြား တစ်ကြိမ် သွင်းပါ။ ရာသီပူပြင်းပါက ၄-၅ ရက်ခြား တစ်ကြိမ် ရေသွင်းပါ။
🚫ရေသွင်းရာတွင် ဘောင်မြုပ်အောင် ရေမသွင်းသင့်ပါ။ ဘောင်ကြား ရေခပ်ပါးပါးသာ သွင်းသင့်ပါသည်။
⦿ သတိထားသင့်သောပိုးရောဂါများ
ခရမ်းချဉ်တွင် ရွက်ထွင်းပိုး ၊ ယင်ဖြူ ၊ မွှားပင့်ကူနီ ၊ သီးလုံးဖောက်ပိုး များအကျများတတ်ပြီး နှောင်းပင်နာကျရောဂါ၊ စောပင်နာကျ ရောဂါ ၊ ခါးရိနှင့် ဘက်တီးရီးယား ပင်ညှိုးရောဂါများကို အထူးသတိထားရပါမည်။
⦿ ရိတ်သိမ်းခြင်း
ခရမ်းချဉ်သီးအတွက် အသီးတင်ချိန်မှ ရင်မှည့်ချိန်အထိ သင့်တော်မည့်အဆင့်တွင် ခူးဆွတ်ရန် လိုအပ်ပါသည်။ ခရမ်းချဉ်သီးအစိမ်းရောင် မှ အစိမ်းဖျော့ ထိုမှတဆင့် အဖြူရောင်များလာချိန်တွင် ခူးဆွတ်ပါက အဝေးဈေးကွက်သို့ တင်ပို့နိုင်ပြီး၊ လမ်းခရီးတွင် အပျက်အစီး အဆုံးအရှုံး သက်သာမည် ဖြစ်ပါသည်။
ဒေသဝန်းကျင်ဈေးတွင် စာပို့ဆောင်ရောင်းချမည်ဆိုပါက ဝမ်းပြင်အဆင့် အဝါရောင်ေပြာင်းစ အသီးများကို ဆွတ်ခူးရောင်းချနိုင်ပါသည်။
မျိုးစေ့ထုတ်ရန်အတွက်မူ အပင်ပေါ်တွင် ကောင်းစွာရင့်မှည့်သည်အထိ ထားရန် လိုအပ်ပါ သည်။
စနစ်တကျစိုက်ပျိုးပါက ကုန်းေမြတွင် အထွက်နှုန်း (၅၀၀၀-၈၀၀၀) ပိဿာ/တစ်ဧက ထွက်နိုင်ပြီး အင်းလေဒေသတွင် တစ်ဧက လျှင် ပိဿာချိန်(၁၀၀၀၀) ထွက်ရှိနိုင်ပါသည်။
and then