ပင်မစာမျက်နှာ သတင်းနှင့်ဆောင်းပါး
2024-02-05
Share to
လယ် ၁၀ ဧက အထက် ရှိတဲ့ တောင်သူတွေကို ယခုလ အတွင်း ချေးငွေများ ထုတ်ချေးပေးသွားမည်

၂၀၂၄ခုနှစ်နွေစပါးစိုက်ရာသီမှာ လယ်ဧက ၁၀ ဧကအထက်ရှိတဲ့ တောင်သူတွေကိုချေးငွေထုတ်ချေးခြင်းအား ယခုဖေဖော်ဝါရီလအတွင်း ချေးငွေများထုတ်ချေးပေးသွားမှာဖြစ်တယ်လို့ မြန်မာနိုင်ငံ ဆန်စပါးအသင်းချုပ် MRF မှသိရပါတယ်။

ချေးငွေထုတ်ချေးဖို့အတွက် ရန်ကုန် ၊ ပဲခူး ၊ နေပြည်တော် ၊ဧရာဝတီတိုင်းမှ တောင်သူဦးရေ ၁ သိန်းကို ကနဦးစိစစ်ရွေးချယ်ထားပြီးဖြစ်တယ်လို့သိရပါတယ်။

" လာမယ့်အပတ်ထဲမှာ ထုတ်ချေးဖို့စီစဉ်ထားပါတယ်၊အခုလ ၁၅ ရက်အတွင်း ထုတ်ချေးပေးမှာပါ ၊ အဓိက တောင်သူတွေ စိုက်ပျိုးစရိတ်အတွက် စိတ်မပူရအောင် ကာလတိုထုတ်ချေးပေးတဲ့သဘောပါ " လို့ MRF မှ တာဝန်ရှိသူတစ်ဦးကပြောပါတယ်။

ချေးငွေထုတ်ချေးဖို့ရွေးချယ်ခံရတဲ့တောင်သူတွေအနေနဲ့ လယ်တစ်ဧကို ငွေကျပ် ၄ သိန်း ထုတ်ချေးပေးမှာဖြစ်ပြီး ချေးငွေကာလက စပါးသီးနှံတစ်ရာသီ (၄)လမှ (၅)လ အထိ ဖြစ်ပြီး အတိုးနှုန်းက (၁) နှစ်ကို (၁၀)ရာခိုင်နှုန်း ဖြစ်တယ်လို့သိရပါတယ်။

အဆိုပါ ချေးငွေကို MRF နဲ့ ပုဂလိကဘဏ်တွေပူးပေါင်းပြီးဆောင်ရွက်ခြင်းဖြစ်ပြီး ချေးငွေကို ပုဂ္ဂလိက ဘဏ်တွေကနေ ထုတ်ချေးပေးမှာဖြစ်ပါတယ်။

" နွေစပါးကစိုက်တယ် ၊ ကျွန်တော်တို့ ဘက်တော့ အဲ့ဒီချေးငွေဘာသံမှမကြားရဘူး။ ရပ်ကျေးဥက္ကဋ္ဌလည်းပြောသံမကြားရဘူး။ ခုထိတော့ဘာမှမသိရဘူး ၊ ရရင်တော့ကောင်းတာပေါ့ " လို့ လယ် ၁၀ ဧကအထက်ပိုင်တဲ့ ပဲခူးအနောက် ခြမ်းကတောင်သူတစ်ဦးကပြောပါတယ်။

MRF ကတော့ ချေးငွေ ရယူလိုတဲ့ တောင်သူတွေကို ချေးငွေလျှောက်ထားခြင်းကို ၂၀၂၃ ဒီဇင်ဘာလ ၂၀ ရက်ကစပြီး ခွင့်ပြုခဲ့တယ်လို့ဆိုထားပါတယ်။

ချေးငွေရယူလိုတဲ့တောင်သူတွေဟာ လျှောက်ထားသူအမည်၊ အဘအမည်၊ နိုင်ငံသားကတ်အမှတ်၊ ပုံစံ (၇)အရ - အမည်ပေါက်( တိုင်းဒေသကြီး/ပြည်နယ်/မြို့နယ်၊ကျေးရွာအုပ်စု/ကျေးရွာ၊ကွင်း/ ဦးပိုင်)၊ ဧရိယာဧက စုစုပေါင်း၊ ဖွံ့ဖြိုးရေးချေးငွေရယူလိုတဲ့ဧက၊ ဖွံ့ဖြိုးရေးချေးငွေလျှောက်ထားလိုတဲ့ စပါးရာသီ - ၂၀၂၃ ခုနှစ် နွေစပါး / ၂၀၂၄ ခုနှစ် မိုးစပါး၊ ဖွံ့ဖြိုးရေးချေးငွေရယူလိုတဲ့(လ/ခုနှစ်)၊လျှောက်ထားသူရဲ့ နေရပ်လိပ်စာအပြည့်အစုံအပါအဝင် ဆက်သွယ်ရန် ဖုန်းနံပါတ်၊လျှောက်ထားသူလက်မှတ် တွေ ကိုဖြည့်သွင်းပြီး မြန်မာနိုင်ငံဆန်စပါး အသင်းချုပ်ကို Email နဲ့ဖြစ်စေ Viber Phone No (09400067240) ဖြစ်စေ၊ တခြားနည်းလမ်းအရဖြစ်စေ ပေးပို့လျှောက်ထားဖို့ အသိပေးပြီး ရွေးချယ်ခဲ့တာဖြစ်တယ်လို့်သိရပါတယ်။

လက်ရှိမှာတော့ ဧရာဝတီတိုင်း အပါအဝင် နေရာအစုံမှာ နွေစပါးကို စိုက်ပျိုးနေကြပြီဖြစ်ပါတယ်။

ချစ်ခွန်းချို(AMIA)

News

ဆက်စပ်သတင်းများ

February 24, 2024
February 24, 2024