မိုးစပါးတွင် ပေါင်းသတ်ဆေး အသုံးပြုခြင်းဆိုင်ရာ အမေးများသော မေးခွန်းများ (FAQ)

မိုးစပါးစိုက်ပျိုးရာတွင် ပေါင်းမြက်များကြောင့် အထွက်နှုန်း မထိခိုက်စေရန် ပေါင်းသတ်ဆေးကို စနစ်တကျ အသုံးပြုရန် လိုအပ်ပါသည်။ တောင်သူများ မကြာခဏ မေးလေ့ရှိသည့် မေးခွန်းများနှင့် အဖြေများကို အောက်ပါအတိုင်း စုစည်းဖော်ပြလိုက်ပါသည်။

၁။ ပေါင်းသတ်ဆေးကို ဘယ်အချိန်မှာ အသုံးပြုရင် အထိရောက်ဆုံးလဲ?

ပေါင်းသတ်ဆေးကို စပါးစိုက်ပြီး (သို့မဟုတ်) ပျိုးထောင်ပြီး (၇) ရက်မှ (၁၀) ရက်အတွင်း အသုံးပြုခြင်းက အထိရောက်ဆုံး ဖြစ်သည်။

• အပင်အဆင့်: ပေါင်းမြက်များ အရွက် ၂ ရွက်မှ ၃ ရွက်အထိ ရှိချိန်တွင် ဖျန်းရပါမည်။

• သတိပြုရန်: ပေါင်းမြက်များ ကြီးထွားလာပြီးမှ အသုံးပြုလျှင် ဆေးထိရောက်မှု သိသိသာသာ လျော့နည်းသွားနိုင်ပါသည်။

၂။ ပေါင်းသတ်ဆေးကို ဘယ်လိုပုံစံနဲ့ အသုံးပြုရမလဲ?

ဆေးအာနိသင် အပြည့်အဝရရှိစေရန် အောက်ပါအချက်များကို လိုက်နာပါ –

• စနစ်တကျဖျန်းခြင်း: ဆေးဖျန်းကိရိယာဖြင့် အပင်ခြေနှင့် ပေါင်းပင်များပေါ်သို့ နှံ့စပ်အောင် ဖျန်းပါ။

• ရေအခြေအနေ: ဆေးဖျန်းချိန်တွင် စပါးခင်းအတွင်း ရေအနည်းငယ် (၁-၂ လက်မ)ခန့်ရှိနေရမည်ရေလုံးဝခမ်းခြောက်နေလျှင် ဆေးအာနိသင် မပြနိုင်ပါ။

• ဆေးဖျန်းပြီးနောက်ပိုင်း: ဆေးဖျန်းပြီး (၂၄) နာရီမှ (၄၈) နာရီအထိ ရေထပ်မထည့်ဘဲ (သို့မဟုတ်) ရေမသွင်းဘဲ ထားသင့်ပါသည်။

၃။ ပေါင်းသတ်ဆေးဖျန်းပြီးပြီးချင်း မိုးရွာပါက ဘာလုပ်ရမလဲ?

မိုးစပါးရာသီတွင် မိုးလေဝသသည် အရေးကြီးသော အချက်ဖြစ်ပါသည်။

• ၃ နာရီအတွင်း မိုးရွာလျှင် ဆေးများ ဆေးကြောခံရနိုင်သဖြင့် ဆေးအာနိသင် မရှိတော့ပါ။

• ထို့ကြောင့် မိုးစဲသွားပြီး (၄) နာရီမှ (၆) နာရီအကြာတွင် ဆေးပြန်လည်ဖျန်းပေးရန် လိုအပ်နိုင်ပါသည်။

၄။ မိမိစပါးခင်းအတွက် ပေါင်းသတ်ဆေးကို ဘယ်လိုရွေးချယ်မလဲ?

စပါးခင်းတွင် ပေါက်ရောက်နေသည့် ပေါင်းအမျိုးအစား (မြက်ပင်၊ ရွက်ပြန့်/ရွက်ဝိုင်း) ပေါ်မူတည်၍ ရွေးချယ်ရပါမည်။

• Pre-emergence (ပေါင်းအုပ်ဆေး): ပေါင်းပင်များ မပေါက်မီ ကြိုတင်ကာကွယ်လိုလျှင် သုံးပါ။

• Early Post-emergence: ပေါင်းပင် ၁၅ ရက်သားမတိုင်မီ (အရွက် ၂-၃ ရွက်အဆင့်) တွင် ဖျန်းရသော ဆေးများကို ရွေးချယ်ခြင်းက ပိုမိုထိရောက်ပါသည်။

၅။ ပေါင်းသတ်ဆေးဖျန်းရာတွင် သတိပြုရမည့် ဘေးအန္တရာယ် ကာကွယ်ရေးအချက်များ

စိုက်ပျိုးသူ တောင်သူများ၏ ကျန်းမာရေးနှင့် ဆေးအာနိသင်အတွက် အောက်ပါတို့ကို ဂရုစိုက်ပါ –

• လေပြင်းတိုက်ချိန်: ဆေးမှုန်များ လွင့်စင်ပြီး အခြားစိုက်ခင်းများကို ထိခိုက်နိုင်သဖြင့် လေပြင်းချိန်တွင် မဖျန်းပါနှင့်။

• ကာကွယ်ရေးဝတ်စုံ: လူနှင့် တိရစ္ဆာန်များအား ဘေးကင်းစေရန် နှာခေါင်းစည်း (Mask) နှင့် လက်အိတ်များကို မဖြစ်မနေ တပ်ဆင်ပါ။

• ဆေးနှုန်းထား: ကုမ္ပဏီမှ ညွှန်ကြားထားသည့် ဆေးနှုန်းထားအတိုင်းသာ တိကျစွာ ရောစပ်ပါ။ ဆေးနှုန်းထား လျော့နည်းလျှင် ပေါင်းမသေဘဲ၊ ဆေးနှုန်းထား များလွန်းလျှင် စပါးပင် ထိခိုက်နိုင်ပါသည်။

အကြံပြုချက်

ပေါင်းသတ်ဆေးကို အသုံးမပြုမီ ဆေးဗူးခွံပေါ်ရှိ ညွှန်ကြားချက်များကို သေချာစွာ ဖတ်ရှုပါ။ “စောစောနှိမ်နင်းခြင်းသည် အထိရောက်ဆုံး” ဖြစ်သည်ကို အမြဲသတိရပါ။

ဤဆောင်းပါးသည် Myanma Awba Facebook Page ဆီသို့ တောင်သူဦးကြီးများအမေးများသော မေးခွန်းများကို မျှဝေပေးခြင်း ဖြစ်ပါသည်။ သိလိုသမျှကို  Myanma Awba Facebook Groupတွင် မေးမြန်းနိုင်ပါသည်။